Tri herë kampion, njihuni me 8-vjeçarin që po shkëlqen në garat ndërkombëtare të matematikës

Detyrat dhe llogaritjet janë pasion për 8-vjeçarin nga Prishtina, Lum Rrahmani, i cili së fundmi është zgjedhur fitues i vendit të parë në garat ndërkombëtare të matematikës në Dubai, shkruan GazetaDemos.

8-vjeçari, nxënës i klasës së tretë, arriti t’i zgjidhë 46 detyra në më pak se tre minuta, në garën ku pjesëmarrës ishin 22 shtete të botës, me mbi 2000 fëmijë.

Në një intervistë për Gazetën Demos ai ka treguar pak nga eksperienca në Dubai.

“Unë e kam mbajt garën e matematikës në Dubai, kam zënë vendin e parë dhe jam gëzuar shumë”, është shprehur nxënësi i klasës së tretë.

Megjithatë, kjo nuk është diçka e re për nxënësin e klasës së tretë, pasi fitues i vendit të parë është zgjedhur për të tretën herë radhazi.

Lumi përveç shkollës, shkon edhe në akademinë “Brainobrain”, kursi në të cilin ushtrohet për matematikë.

Mësuesja e tij nga “Brainobrain”, Vjosa Gashi, thotë se suksesi i tij i ka bërë shumë krenarë.

“Gara ka qenë vetëm tre minuta dhe lumi ka garuar për nivelin e tij, për nivelin e pestë ku ka mbledhje, zbritje, pjesëtim, shumëzim, ku gara është dashur të përfundohet brenda tre minutave, ku krahas shpejtësisë është kërkuar edhe saktësia. Lumi ia ka dalë mjaft mirë, duke na bërë krenarë me vendin e parë, në kategorinë e tij”, ka potencuar ajo.

Ani pse tashmë vijon mësimet në klasën e tretë, detyrat me numra prishtinasi ka filluar t’i zgjidhë që nga mosha 3-vjeçare, ende pa e filluar shkollën.

Rrëfimin e tij të plotë mund ta ndiqni këtu: