Tre burra gjejnë vdekjen në festat me dema në Spanjë

Tre burra kanë vdekur në 24 orë nga plagët e marra gjatë festivaleve të vrapimit të demave në Spanjë.

Ata të tre kishin marrë pjesë në festivalin “bous al carrer” (vrapim me dem) tradicional të rajonit të Valencias, kur demat kalojnë nëpër qytete, shpesh me njerëz që vrapojnë përpara tyre.

Grupet e të drejtave të kafshëve janë ankuar prej kohësh për rreziqet si për publikun ashtu edhe për kafshët.

Ata thonë se 20 njerëz kanë vdekur në rajon në tetë vitet e fundit për shkak të këtyre festave.

Tre burrat që vdiqën ishin plagosur rëndë gjatë dy javëve të fundit.

Në një nga incidentet një burrë 56-vjeçar, i cili kishte qëndruar pas një blloku në mes të rrugës, u hodh në ajër nga demi dhe pësoi një dëmtim traumatik në tru. Ai vdiq të martën në spitalin e Valencias, nëntë ditë pas ngjarjes.

Një burrë, 50 vjeç, gjithashtu vdiq në spital pasi demi ia kishte shpuar mushkërinë.

Po ashtu, edhe një vizitor francez, 64-vjeçar, vdiq të hënën nga plagët që pësoi në Pedreguer.

Incidentet e rënda janë bërë ngjarje të zakonshme gjatë vrapimit të demave vitet e fundit.