Trajkoviq: Zyrtarët e Listës Serbe kanë ikur nga Kosova

Momçillo Trajkoviq, politikan serb nga Kosova, ka folur nga Graçanica duke pretenduar që politikanët e Listës Serbe janë larguar nga vendi ynë.

Trajkoviq në një adresim për një medium serb është shprehur si vijon:

“Situata është e paqartë, mesazhet e dërguara nga Kurti janë tmerruese, katastrofale, dhe nuk ka asnjë perspektivë për popullin serb. Nuk ka mesazhe të qarta nga Beogradi. Ato shpesh janë demoralizuese, dhe zyrtarët e Listës Serbe janë larguar nga Kosova duke e lënë popullin mbrapa,” – është shprehur ai.

Trajkoviq është shprehur tutje se kjo është “mposhtje e politikës serbe në Kosovë” dhe se nëse nuk bëhet asgjë atëherë (sic) serbët e Kurtit do të vijnë në skenë.

Duhet thënë që në fakt shumë prej politikanëve të Listës Serbe vazhdojnë të jenë në Kosovë, përfshirë edhe kryetarët e gjashtë komunave në jug të vendit. Sidoqoftë, nuk dihet nëse z. Trajkoviq e ka pasur fjalën për liderët e kësaj partie apo për të gjithë zyrtarët.