Tragjedia në Koçan: Dhjetëra familjarë akoma nuk dinë për fatin e fëmijëve, kërkojnë ndihmë në rrjete sociale

Në rrjetet sociale janë shfaqur disa fotografi të personave që ishin të pranishëm në ngjarjen tragjike në diskotekën “Puls” në Koçan ku humbën jetën të paktën 50 persona dhe u lënduan dhjetëra të tjerë nga zjarri që përfshiu klubin e natës.

Në “Instagram” dhe “Facebook” po shpërndahen fotografi të të rinjve duke kërkuar informacione për më të afërmit e tyre, ka raportuar mediumi maqedonas, Kanal 5.

Fotografitë e tyre, së bashku me emrat dhe numrat e telefonit janë shpërndarë, me kërkesën që, nëse dikush e di në cilën spital ndodhen ose ka ndonjë informacion tjetër, të njoftojë në numrat e dhënë.

Rreth tragjedisë:

Një zjarr në një klub nate në qytetin lindor të Maqedonisë së Veriut, Koçan, ka shkaktuar vdekjen e të paktën 51 personave dhe plagosjen e disa të tjerëve, ka bërë të ditur Ministri i Punëve të Brendshme i Maqedonisë së Veriut, Pançe Toshkovski.

Ai gjithashtu citohet të ketë deklaruar se “ka shumë të tjerë të lënduar”, raporton Kanal 5.

Sipas mediave lokale, zjarri dyshohet se shpërtheu rreth orës 3 të mëngjesit, për shkak të përdorimit të mjeteve piroteknike gjatë një koncerti ku ishin të pranishëm rreth 1.500 persona, pas së cilës ndodhi një kaos për të dalë jashtë.