Terrorizmi në Banjskë, Serweri: Vuçiqi imitoi strategjinë e Putinit në Donbas dhe Krime

Specialisti në fushën e menaxhimit të konfliktit dhe një nga vëzhguesit më të njohur të zhvillimeve politike në Ballkanin Perëndimor, Daniel Serwer, ka thënë se ambiciet e hapura politike të presidentit të Serbisë, Aleksandar Vuçiq, për të kontrolluar serbët jashtë territorit të Serbisë, përbëjnë kërcënimin më të madh për rajonin.

Në një prononcim për portalin malazez “Antena M”, profesori amerikan ka theksuar se këtë e ka dëshmuar edhe sulmi terrorist i paramilitarëve serbë më 24 shtator në fshatin Banjë të Zveçanit – komunë e banuar me shumicë serbe – një kryengritje e armatosur, qëllimi parësor i së cilës ka qenë aneksimi i veriut të Kosovës sipas modelit të Rusisë në Ukrainë.

“Unë mendoj se ambiciet e tij, të mbështetura nga Rusia, janë kërcënimi më i madh për paqen dhe stabilitetin në rajon. Historia nuk përsëritet, por ajo rimon. Dyshoj se rajoni do të shkojë në një luftë për tre vjet e gjysmë, siç ishte në Bosnjë-Hercegovinë në vitet 1990, por sigurisht që mund të shohim paqëndrueshmëri serioze”, ka thënë Serweri, transmeton AlbanianPost.

E duke komentuar zhvillimet politike në Mal të Zi, profesori amerikan ka thënë se ekzekutivi i ri malazez në krye me Millojko Spajiq është i gatshëm t’u shërbejë interesave serbe dhe ruse, sepse sipas tij, në qeverisje është përfshirë edhe një koalicion politik që nuk përfaqëson vlerat perëndimore dhe është armiqësore kundrejt pavarësisë së Kosovës.