Të shtëna me armë zjarri në Prishtinë, arrestohet një person

Rastet e të shtënave me armë zjarri janë bërë mjaft të shpeshta dhe jo rrallëherë përfundojnë me të plagosur e madje edhe tragjikisht.

Përdorimi i armëve nëpër rrugë e hapësira publike po cenon kështu edhe sigurinë e qytetarëve. Një rast i tillë ka ndodhur mbrëmë, në rrugën “Richard Holbrooke” në Prishtinë.

Këtë herë i dyshuari dhe viktima ishin në komunikacion kur ndodhi incidenti, motivet e të cilit akoma nuk dihen.

Burimet e Sinjalit nga Prokuroria kanë bërë me dije për Sinjalin se rasti është denoncuar nga viktima, i cili ka raportuar se një person e kishte ndalur teksa ishte me veturë dhe më pas ka shtënë me armë zjarri në ajër.

Bazuar në dëshminë e tyre, mësohet se i dyshuari (emër i njohur për redaksinë) ka tentuar ta frikësojë viktimën, duke e nxjerrë armën, të cilën e shkrepi 1 herë, për motive akoma të panjohura.

Posa rasti është denoncuar, një njësi policore ka intervenuar, ku në vendin e ngjarjes kanë gjetur një gëzhojë, që është sekuestruar nga Policia dhe janë bërë ekzaminimet e nevojshme.

Pas përfundimit të procedurave, Prokurori i Shtetit ka urdhëruar që i dyshuari të ndalohet për 48 orë dhe ndaj tij të iniciohen rastet për dy vepra penale “Përdorim i armës apo mjetit të rrezikshëm” dhe “Armëmbajtje pa leje”.