Taulant Xhaka: I propozova Granitit të mos luajë kundër Serbisë

Zvicra të shtunën do të përballet me Serbinë në kuadër të Ligës së Kombeve.

Pas dueleve në Botërorin 2018 dhe 2022, të gjithë sytë janë te kapiteni i Natit, Granit Xhaka.

Ndërkohë, në Serbi i vlerësojnë aftësitë futbollistike të Xhakës.

“Mendova se s’është e vërtetë”, thotë për “Blick” Taulant Xhaka për momentin kur u shpall shorti me Sebinë si kundërshtare e Zvicrës në Ligën e Kombeve.

Fakti që tani është ndeshja e parë në Serbi për kapitenin e Nati-t, Granit Xhaka pas dueleve të nxehta në Botërorin 2018 në Rusi dhe 2022 në Katar, është marrë me shqetësim nga familja e tij.

Vetë Taulant Xhaka ishte në stadiumin e Beogradit në vitin 2014 kur u ndërpre ndeshja me kombëtaren shqiptare kundër Serbisë. “Unë e di vetë se sa presion dhe emocion duhet të durosh në këtë lojë”.

Kjo është arsyeja pse vëllai i madh e mori telefonin në Bazel menjëherë pas shortit, siç tregon ai për “Blick”. “I propozova Granitit që të fliste me trajnerin Murat Yakin dhe ndoshta ta shmangte këtë lojë – por të gjithë e njohim vëllain tim, ai dëshiron të luajë çdo ndeshje për Zvicrën”, tha Taulant Xhaka.

33-vjeçari shpreson para së gjithash që të mos jenë ditë kaq emocionale dhe kaotike si në duelet e mëparshme. “Nuk është e lehtë të mbash veten nën kontroll gjatë 90 minutave kur bëhet përsëri kaq emocionale. Graniti duhet të qëndrojë i qetë, të luajë futboll, të fitojë dhe të injorojë provokimet. Është e lehtë të thuash, por në fund gjithçka ka të bëjë me këtë: të luash ndeshje futbolli dhe të fitosh”.

“Granit Xhaka perceptohet si provokator”

Federata Zvicerane e Futbollit dëshiron ta mbajë këtë çështje sa më të vogël që të jetë e mundur. “Këto janë histori të vjetra. Është një lojë si çdo tjetër”, thotë drejtori i Nati, Pierluigi Tami. Mendimi është i ngjashëm nëse pyet futbollistët në Zvicër. “Pres një ndeshje normale futbolli dhe mendoj se të dyja palët kanë mësuar nga e kaluara”, ka thënë ish-bashkëlojtari i kombëtares zvicerane, Admir Mehmedi.

Në të njëjtën mënyrë e vlerëson situatën edhe kapiteni i klubit Grasshoppers, Amir Abrashi, i cili aktualisht është në kombëtaren shqiptare dhe ka luajtur përkrah Taulant Xhakës në vitin 2014. “Nuk do të jetë aq e nxehtë si në të kaluarën. Përveç kësaj, ka mbetur vetëm Graniti – në dy duelet e fundit shumë është zier edhe rreth Xherdan Shaqirit”, tha Abrashi.

Dhe si e shohin serbët këtë çështje? “Granit Xhaka perceptohet si provokator kur sheh se si është sjellë në ndeshjet e fundit”, thotë gazetari serb i futbollit Velko Ivanoviq i Sportal.rs. Ai përmendi rastet e Xhakës, nga kapja e organit gjenital, fanella e Jasharit në Botërorin e Katarit apo festimi me shqiponjën dykrenare në Botërorin e Rusisë.

Pas dy dueleve mes Serbisë dhe Zvicrës, të cilat kanë bërë mjaft tituj jashtë fushës, serbët janë të mendimit: “Nuk duam të merremi më me gjëra që kanë pak lidhje me futbollin”. Kjo i referohet historisë së familjes Xhaka, për shembull: Prindërit janë me prejardhje kosovare, dhe babai ka qenë dikur në burg për arsye politike në shtetin e atëhershëm multietnik të Jugosllavisë.

Sigurisht që kapiteni i Zvicrës duhet të presë fishkëllima dhe brohoritje të shtunën në stadiumin Duboçica në Leskovc. “Por edhe në Serbi e njohin se çfarë futbollisti i shkëlqyer është Granit Xhaka”, tha Ivanoviq. Trajneri i Serbisë, Dragan Stojkoviq, ka vlerësuar sërish kapitenin e Natit para mediave vendase: “Ai është një lojtar i madh që ka shumë vite që luan në një nivel botëror. E vlerësoj shumë”.