Tahiri: Stafi politik i Ministrisë së Drejtësisë janë të padijshëm, pushteti i Kurtit nuk arriti ta kapë KPK-në

Kryetari i Grupit Parlamentar të PDK-së, Abelard Tahiri, ka akuzuar Ministrinë e Drejtësisë për padituri.

Në një konferencë për media, ai ka thënë se të gjitha iniciativat e kësaj ministri po kontestohen në gjykata.

Sipas tij, kjo ministri është e mbipopulluar me staf politik të padijshëm.

“Çka me thane për Albulenën, atë sa herë të dërgojmë në gjykatë, si të rregullta dhe si kushtetuese ne e fitojmë rastin. Fatkeqësisht, Ministria e Drejtësisë është e mbipopulluar prej një stafi politik të cilëve u ka dhënë mandat Albin Kurti dhe janë të padijshëm. Pra, të gjitha iniciativat e tyre tashmë nuk prodhojnë asgjë. Ose janë në kundërshtim me kushtetutën ose janë të dobëta që nuk arrijnë me pas efekt për qytetarët”, ka thënë Tahiri.

Ai ka thënë se Ligji për Këshillin Prokurorial, i cili dje është rrëzuar nga Gjykata Kushtetuese, ishte kundërshtuar edhe nga ndërkombëtaret.

“Ky ligj ka marrë goditje të madhe edhe nga partnerët tanë ndërkombëtar, nga BE-ja, nga ambasada e SHBA-së, si një ligj që nuk duhet të procedohet me tute, sepse është një ligj që e cenon pavarësinë e Këshillit Prokurorial të Kosovës. Pra, ky ligj nuk e ka pasur përkrahjen as të partnereve tanë”, ka thënë Tahiri.

Ai ka deklaruar se dje ka dështuar edhe një përpjekje e Kurtit për ta futur nën kthetra KPK-në.

“Kemi pasur një debat jashtëzakonisht të gjatë dhe kemi kërkuar nga ministrja e Drejtësisë dhe kryeministri që ky projektligj të tërhiqet sepse si i tillë padyshim që nuk i përmbush standardet kushtetuese të Republikës së Kosovës dhe nuk mund të kalojë. Mbrëmë Kushtetuesja ka bërë publike që këtë ligj e ka nxjerrë në kundërshtim me Kushtetutën e Republikës e Kosovës, gjë që është lajm shumë i mirë për drejtësinë në Kosovë që pushteti i madh i Albin Kurtit nuk arriti ta vendosë nën kthetra edhe një institucion kaq të rëndësishëm siç është KPK-ja”, ka thënë ai.