Tahiri: Pushteti aktual do që ta shtyjë çdo zhvillim deri në zgjedhjet lokale, kampi ish-opozitar t’i ndërmarrë këto tri veprime që tani

Ish-deputeti i AAK-së, Besnik Tahiri tha se pushteti aktual është “përfituesi i heshtur” i ngërçit politik.

Tahiri shkroi në Facebook se partitë tjera shqiptare nuk duhet të taktizojnë, por duhet t’i ndërmarrë disa vendime “që tani”.

Sipas tij, këto parti duhet të nisin “dialogun brenda kampit ish-opozitar”, duhet “të përgatitet për vendimin e Gjykatës Kushtetuese” dhe “të ndjek afatet kushtetuese për formimin e qeverisë”.

“Në qoftë se VV krijonë qeveri me 61 deputetë kjo është më së miri për ndryshim i cili do të ndodh në fillim të vitit 2026, e në qoftë se nuk krijohet kjo qeveri (unë besoj që nuk e dëshiron Kurti këtë opcion) atëherë duhet të formohet një qeveri opozitare që do të ndërmarrë pesë veprime konkrete në 3 mujat e parë”, shkroi ndër tjerash Tahiri.

Postimi i Besnik Tahirit:

Pas seancës së djeshme të 24 duhet të themi disa çështje drejt, pushteti aktual është përfituesi i heshtur i kësaj situate. Si opozitë paraprake, duhet ta shohim këtë realitet.

Qeveria aktuale, me mbi 350 persona, përfshirë kryeministrin, zëvendëskryeministrat, ministrat, zëvendësministrat, kabinetet dhe stafin politik të emëruar nga partia, vazhdon të qëndrojë në zyrë pa një legjitimitet të ri. Ndërkohë, vendi po stagnon dhe po përballet me pasiguri. Kjo nuk është rastësi, është një strategji e qëllimshme për të shtyrë çdo zhvillim deri në zgjedhjet lokale të tetorit. Qetësia e tyre nuk është përgjegjësi shtetërore, është një llogari e ftohtë për pushtet dhe fushatë.

Duke e pasur parasysh këtë strategji, opozita e djeshme nuk duhet të taktizojë por duhet të ndërmarrë tri veprime që tani:

1. Të nisë dialogun brenda kampit ish-opozitar;
2. Të përgatitet për vendimin e Gjykatës Kushtetuese dhe
3. Të ndjek afatet kushtetuese për formimim e qeverisë;

Në qoftë se VV krijonë qeveri me 61 deputetë kjo është më së miri për ndryshim i cili do të ndodh në fillim të vitit 2026, e në qoftë se nuk krijohet kjo qeveri (unë besoj që nuk e dëshiron Kurti këtë opcion) atëherë duhet të formohet një qeveri opozitare që do të ndërmarrë pesë veprime konkrete në 3 mujat e parë:

– Uljen e çmimit të energjisë (i lehtësohet jeta sektorit privat)

– Rritjen e pagave në sektorin publik (motivohet administrata e shtetit për punë e reforma)

– Anëtarësimin e vendit në Këshillin e Evropës;

– Përgatitjen dhe menaxhimin e zgjedhjeve lokale;

– Fillimin e procesit për zgjedhjen e Presidentit, duke qenë të gatshëm edhe për zgjedhje të reja nëse kjo dështon.

Shkurt e shqip, opozita e ka në dorë largimin e shtabin zgjedhor të VV-së të zgjedhjeve lokale nga qeveria qendrore, e cila përfshin mbi 350 të punësuar politikisht, që do të përdoren si mjet për fushatën komunale. Mos ua jepni kohën, mjetet dhe institucionet për ta realizuar këtë pa asnjë përgjegjësi.

Përndryshe, kur ta kenë marrë edhe pushtetin lokal, mos t’vajtojmë!