Tahiri për emërimin e Luljeta Aliut: Krejt dhe zhdrejtë, kundër fjalës së lirë, në mbrojtje të korrupsionit qeveritar

Shefi i Grupit Parlamentar i PDK-së, Abelard Tahiri ka reagaur ndaj emërimit të Luljeta Aliut për anëtare të Komisionit të Pavarur të Mediave (KPM).

Tahiri tha se mësymja për të kapur mediat u kompletua me emërimin e Aliut për anëtarë të KPM-së.

“Mësymja e Vetëvendosjes për të kapur mediat e lira dhe veçmas RTK-në si transmetues publik, pas Bordit e Redaksisë, u kompletua sot në Kuvend me emërimin e Luljeta Aliut, një militanteje politike të Lëvizjes Vetëvendosje, si anëtare të Komisionit të Pavarur për Media.”, shkroi Tahiri në Facebook, përcjell Reporteri.net.

Tutje ai tha se kapja e mediave është simptoma e parë e një pushteti të korruptuar që frikësohet nga të bëmat e tij e të cilat siç thotë ai, kërkon t’i mbajë në kontroll.

“Kapja e mediave është simptoma e parë dhe më domethënëse e një pushteti të korruptuar, që frikësohet nga të bëmat e tij të cilat kërkon t’i mbajë nën kontroll e jashtë vëmendjes së qytetarëve.”, shtoi Tahiri.

“Krejt dhe zhdrejtë, kundër fjalës së lirë, në mbrojtje të korrupsionit qeveritar.”, përfundoi ai.

Në Kuvend sot është votuar për tre anëtar të KPM-së ku Luljeta Aliu u zgjodh në rundin e parë, ndërsa, dy të tjerët nuk u zgjodhën.

Ndërkaq, Qendra Evropiane për Liri të Mediave ka shprehur shqetësim lidhur me këtë vendim të Kuvendit, për ta zgjedhur Luljeta Aliun anëtare të Komisionit të Pavarur për Media (KPM).

Sipas tyre kjo bie ndesh me procesin e depolitizimit të KPM-së që kishte filluar VV-ja.