Tahiri për Asociacionin: Është një çështje pa kthim që fatkeqësisht do të realizohet pa njohje reciproke

Shefi i Grupit Parlamentar të PDK-së, Abelard Tahiri, njëherësh ish-ministër i Drejtësisë, ka deklaruar se çështja e Asociacionit të Komunave me Shumicë Serbe tani është çështje pa kthim, gjë që sipas tij, do të realizohet pa njohje reciproke mes Kosovës dhe Serbisë.

“Siç duket Kurti e ka marrë një drejtim, na ka bërë të qartë në dy seancat e fundit po ashtu me kushtet e tij, duket se tashmë kjo do ta ketë një epilog së shpejti. Çështja e jetësimit të ssaj që ne e quanim Asociacioni Kurti e quante Zajednicë, është një çështje pa kthim që tashmë do të realizohet, mirëpo fatkeqësisht jo me njohje”, ka deklaruar Tahiri në emisionin Debat Plus.

Tahiri ka thënë se kryeministri i Kosovës, Albin Kurti, është duke lënë gjurmë në dialogun Kosovë-Serbi, pasi sipas tij, sot është një situatë e re kur edhe marrëveshjet nga diskutimi kanë kaluar në dokumente.

“Qe pse po lë gjurmë, ne sot kemi një situatë të re në dialog, ne sot kemi një marrëveshje para vetës në dialog, ne sot e kemi planin franko-gjerman, kemi parë sa kemi atë prej mediave edhe RTV dukagjini që ka nxjerr në publik i pari një dokument jashtëzakonisht të rëndësishëm”, është shprehur Tahiri i PDK-së, për përgjigjen se pse Kurti po lë gjurmë në dialog.

“Nuk vijnë marrëveshjet në tavolinë merre ose lëre ky është angazhim i përbashkët, kjo marrëveshje, plani franko-evropian është produkt i një diskutimi deri në shtator të vitit të kaluar nga 1 shtatori ka filluar ta marrë formën  si dokument”, është shprehur tutje ai.

Tahiri ka deklaruar se PDK-ja ka kërkuar nga Kurti që kjo marrëveshje në qendër ta ketë njohjen reciproke, duke shtuar se Kosovës dhe popullit i duhet çështja me Serbinë të mbyllet.

Tutje ai ka thënë se një prej fushave që kryeministrin Kurti PDK-ja e ka lënë të qetë ka qenë pikërisht dialogu.

“Asnjëherë nuk e kemi lënë në pozitë të sikletshme, sepse në raport me Serbinë duhet të sillemi në të kundërtën prej asaj që ka bërë VV-ja në të kundërtën”, është shprehur ai.

Ndërkaq, ai ka thënë se një marrëveshje është një propozim i një angazhimi dy vjet në dialog mes Kosovës dhe Serbisë, “ato normalisht kanë palët që nuk pajtohen mirëpo është një draft i cili në pjesë të ndryshme është diskutuar nga zyrtarët tanë dhe zyrtarët e shtetit serb, në kuadër të këtyre bisedimeve”, ka thënë ai.

Po ashtu, ai ka thënë se PDK-ja e ka pyetur kryeministrin Kurtin se cilat janë çështjet që ka propozuar Kosova në lidhje me marrëveshjen.