Tahiri: Aleksandër Vuçiqi ishte ai që vendosi e i hoqi barrikadat, Albin Kurti ishte spektator

Shefi i Grupit Parlamentar të Partisë Demokratike të Kosovës, Abelard Tahiri, ka reaguar pasi që disa nga barrikadat janë hequr nga veriu i Kosovës.

Tahiri përmes një postimi në Facebook, ka thënë se e vërteta që u pa nga këto zhvillime, është se Presidenti i Serbisë, Aleksandar Vuçiq, ishte ai që i vendosi dhe ai që i hoqi barrikadat.

Ndërsa sipas tij, Kryeministri i Kosovës, Albin Kurti ka qëndruar si spektator përballë tyre.

“Eksponentë të VV-së janë rrokur pas valles që po i prinë Kryeministri Kurti, për t’ua shpalosur qytetarëve “suksesin” e heqjes së barrikadave, thuajse ato ishin vendosur në Rashkë apo Nish, e jo në Mitrovicë, Zubin Potok e Leposaviq. E vërteta që u pa krejt hapur nga ky zhvillim, është se në fakt, Aleksandër Vuçiqi ishte ai që vendosi e i hoqi barrikadat brenda Kosovës sipas dëshirës, ndërsa kryeministri Kurti ishte gjatë tërë kohës, një spektator i devotshëm dhe komentator rrethanor. Një Vuçiq që vendosë barrikada brenda Kosovës, e një kryeministër i Kosovës që rri si spektator përballë tyre, është fotografia që përmbledhë mjerimin shtetëror nën qeverisjen e VV-së”, ka shkruar Tahiri.