Sveçla: Policët tonë u sulmuan me shok bomba, Serbia dëshiron të destabilizojë sërish veriun

Ministri i Punëve të Brendshme të Kosovës, Xhelal Sveçla ka thënë se Serbia po dëshiron ta destabilizojë sërish veriun e vendit, pasi sipas tij, krerët e shtetit serb, po glorifikojnë kriminelët që sipas Sveçlës po kryejnë akte edhe terroriste në Kosovë, shkruan GazetaDemos.

Sveçla në postimin e tij ka thënë se në Mitrovicën e Veriut, janë sulmuar policë të Kosovës me shok bomba.

“Mbrëmë pas këtyre thirrjeve janë sulmuar pjesëtarët e policisë sonë me shok bomba në Mitrovicë të Veriut. Thirrja për kryengritje dhe rezistencë është vepër e rëndë penale në Republikën e Kosovës. Ajo bëhet edhe e papranueshme kur vjen nga një subjekt parlamentar politik. Të tillët duhet të trajtohen dhe nga institucionet e pavarura e KQZ, për të verifikuar përshtatshmërinë e tyre në raport me rendin tonë kushtetues”, ka shkruar Sveçla.

Ai ndër të tjera ka thënë se kjo nuk është hera e parë kur ka akte të tilla ndaj policëve të Kosovës.

“Nuk është hera e parë që sulmojnë, por për shumë grupe kriminale këto akte mbeten dhe të fundit. Sado zell të kenë grupet e tilla për destabilizim dhe kërcënim, zelli dhe vullneti për mbrojtjen e rendit publik nga institucionet tona është i pamatshëm dhe i parezervë”, ka shkruar Sveçla.