Gëzim Sveçla, kryetar i grupit të asamblistëve të Lëvizjes Vetëvendosje në Prishtinë, ka deklaruar se me përjashtimin e Besnik Mujecit nga të gjitha funksionet e partisë kanë vendosur një standard të ri në politikbërje.
Ai në “Five” tha se në VV nuk ka vend për personat që i shkelin ligjet.
“Në organizatën tonë nuk ka vend për njerëzit që shkelin normat ligjore, njerëzore dhe frymën e Lëvizjes. Dje është mbajtur një mbledhje urgjente dhe unanimisht është vendosur që Mujeci të përjashtohet nga anëtarësia dhe nga strukturat e partisë. Ky është një standard i ri në politkbërje që ka të bëjë me pastërtinë e figurave dhe zyrtarëve ku është marrë vendim për herë të parë që një individ të përjashtohet pa iu bërë gjyqit, për shkak se rasti ka qenë në flagrancë dhe s’ka pasur tjetër rrugë përveç largimit”, tha ai.
Sveçla tha se Mujeci asnjëherë nuk a ka ushtruar detyrën e tij si aksionar në ndërmarrjen publike Stacioni i Autobusëve.