Sulmi brutal ndaj doktorit në Malishevë, dyshohet se erdhi nga familjarët e gruas që vdiq pas trajtimit në klinikën e tij

Gjatë ditës së sotme GazetaDemos ka raportuar se stomatologu, Xhavit Karaxha, është rrahur  afër QKMF-së në Malishevë.

E rrahja duket se ka ndodhur nga bashkëshorti dhe babai i të ndjerës 35 vjeçare nga Malisheva e cila para disa kohësh humbi jetën pasi nxori një dhëmb në ordinancën e mjekut Karaxha.

Në një prononcim për Sinjali, nga familja e Karaxhës kanë bërë me dije se gjithë ky rast i rëndë ndodhi në prani të nënës se doktorit teksa familja ishte në një restorant në Malishevë.

Sipas informacioneve të para, nëna e Karaxhës u përballë me sulmin ndaj të birit, në mes të restorantit – ku fillimisht e rrëzuan atë përtokë e doktorin filluan ta godasin.

“Kanë kërcënuar familjen në format më të rënda, s’kanë kursyer as gra e as fëmijë..” – tha i shqetësuar një familiar i doktorit.

Karaxha i cili pësoi lëndime të rënda trupore përfundoi në Emergjencë për trajtim mjekësor e më pas u transferua në Qendrën Klinike Universitare të Kosovës.

Kujtojmë se një fakt me rëndësi sa i përket pacientes së ndjerë është se e njëjta ka qenë alergjike në anestezionin që i është dhënë dhe si rezultat i shokut anafilaktik kishte humbur jetën.

GazetaDemos ka kontaktuar Policinë për të marrë një konfirmim zyrtar lidhur me rastin, por të njëjtit ende s’kanë kthyer përgjigje.