Sulmet izraelite në Gaza: Numri i të vdekurve rritet pothuajse në 56.300

Të paktën 56.259 palestinezë janë vrarë në Rripin e Gazës që nga tetori i vitit 2023 si pasojë e ofensivës izraelite, të cilës autoritetet palestineze i referohen si një luftë gjenocidale, raporton Anadolu, duke cituar Ministrinë e Shëndetësisë në Gaza.

Vetëm në 24 orët e fundit, 103 trupa janë sjellë në spitale dhe 219 persona janë plagosur. Kjo e çon numrin e përgjithshëm të të plagosurve në të paktën 132.458.

Sipas njoftimit të ministrisë, shumë trupa vijojnë të mbeten nën rrënoja, pasi ekipet e shpëtimit nuk kanë mundësi t’i arrijnë për shkak të vazhdimësisë së bombardimeve.

Që nga rifillimi i sulmeve më 18 mars, pas ndërprerjes së një armëpushimi të përkohshëm, Izraeli ka vrarë të paktën 5.936 palestinezë të tjerë dhe ka plagosur mbi 20.000.

Ndërkohë, në nëntor 2024, Gjykata Ndërkombëtare Penale lëshoi urdhër-arreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, duke i akuzuar për krime lufte dhe krime kundër njerëzimit.

Gjithashtu, Izraeli përballet me një padi për gjenocid në Gjykatën Ndërkombëtare të Drejtësisë për luftën në Gaza.