Subvencioni për blerje të librave shkollorë, Haxhiu ka një kërkesë për përmbaruesit privat

Ministria e Drejtësisë, Albulena Haxhiu, ka lëshuar një udhëzues përmes të cilit u ka kërkuar përmbaruesve privatë që t’i zhbllokojnë përkohësisht llogaritë e bllokuara të debitorëve.

Kjo kërkesë e Haxhiut vjen pas nevojës që prindërit t’i marrin subvencionet nga MASHT, për blerjen e teksteve shkollore.

“Udhëzohen zyrat e përmbaruesve privatë që në pajtim me situatën faktike, të shqyrtojë mundësitë për lehtësimin e pagesave në llogaritë e bllokuara të debitorëve- prindër të nxënësve përfitues nga platforma e lansuar nga MASHTI për subvencionimin e teksteve shkollore (përmes zhbllokimit të përkohshëm të llogarive të bllokuara të debitorëve në rastet kur të njëjtit pranojnë mjete financiare subvencionuese të destinuara për blerjen e teksteve shkollore dhe materialeve të tjera mësimore, me qëllim të tërheqjes së këtyre mjeve deri në vlerën e destinuar për këtë qëllim), thuhet në Udhëzues.

MASHT ka deklaruar se qysh sot, prindërit do të duhet të aplikojnë për subvencionet prej 80 eurosh për furnizim me tekste për fëmijët. Paratë u janë premtuar t’u dalin në xhirollogari javën e ardhshme.