Çështja e shqiptarëve në Luginën e Preshevës do të diskutohet sot edhe në Parlamentin Evropian, njoftoi këshilltarja e kryeministrit Albin Kurti, Ardita Sinani, e cila gjithashtu kishte qenë edhe Kryetare e Komunës së Preshevës.
Sinani tha se do të qëndrojë në Bruksel për tri ditë, ku do të ngritet problematika e shqiptarëve të Preshevës, Medvegjës e Bujanocit.
“Pas ngritjes së problematikës së shqiptarëve të Luginës së Preshevës në Kongresin e Senatin Amerikan dhe në Organizatën e Kombeve të Bashkuara, adresa jonë e radhës do të jetë Parlamenti Evropian”, shkroi ajo në Facebook.
“Së bashku me anëtarët tjerë të delegacionit nga Lugina e Preshevës, do të jem në vizitë 3 ditore në Bruksel për të ngritur problematikën e shqiptarëve të Preshevës, Medvegjës e Bujanocit në Parlamentin Evropian dhe Këshillin e Evropës”, njoftoi mes tjerash Sinani.