Sot nafta mbi 1.90 në Kosovë, dikur Murati kritikonte çmimin e lartë të saj prej 1.20

Rekordet e çmimit të naftës në Kosovë po thyhen pothuajse në baza ditore, dukë shënuar çmimet më të larta ndonjëherë në vend, shkruan GazetaDemos.

Qytetarët në shumë raste kanë shprehur indinjatën e tyre rreth këtij çmimi, por që arsyetimi i Qeverisë së Kosovës është se janë duke punuar në këtë aspekt.

Madje, është ministri i Financave, Hekuran Murati ai që po tregohet më i zëshmi nga të gjithë, ku në shumë raste ka kritikuar edhe opozitën për akuza qëllimkeqe karshi Qeverisë.

Por, në një kohë jo shumë të largët ishte ministri Murati në vendin e opozitarit që kritikonte çmimin e lartë të naftës.

Besoni apo jo, çmimi në atë kohë sillej deri në 1.20 euro për litër.

Ndërkohë, Murati shkruante në Facebook se taksa që ishte në fuqi ndaj Serbisë në 2018 “i mbulonte të gjitha gjynahet”.

Ky është shkrimi i Muratit më 9 dhjetor të 2018:

Veç thash t’ju tregoj që nafta në Kosovë (përfshi akcizën dhe tatimet) po hyn me 0.90-0.95 euro/litër, ndërsa çmimi i shitjes me pakicë assesi të bie nën 1.20 euro/litër.
Autoriteti që mbikëqyr tregun e derivateve – Ministria e Tregtisë dhe Industrisë.
Kryesorja, taksa ndaj Serbisë po i mbulon të gjitha gjynahet!