Sot mblidhet Këshilli i Sigurimit të OKB-së për Bosnjë dhe Hercegovinë

Sot në selinë e Kombeve të Bashkuara në Nju Jork do të mbahet seanca e Këshillit të Sigurimit, ku do të diskutohet për gjendjen politike në Bosnje dhe Hercegovinë.

Në këtë seancë do të raportojë Përfaqësuesi i Lartë për Bosnjë dhe Hercegovinë, Christian Schmidt, i cili pritet të japë një pasqyrë mbi zhvillimet e fundit në vendin ballkanik.

Ndërkohë, Qeveria e entitetit serb të Bosnjës, Republika Serbe, ka dorëzuar një raport paralel, në të cilin pretendon se udhëheqja e RS-së “vepron me qëllim të ruajtjes së Marrëveshjes së Paqes të Dejtonit, të cilën Republika Serbe e respekton plotësisht, si dhe Kushtetutën e BeH, e cila është pjesë përbërëse e saj”.

Në raportin e tyre, autoritetet e këtij entiteti kritikojnë ashpër Christian Schmidt, duke e quajtur “të paligjshëm” dhe duke pretenduar se “në vend që të respektohet Marrëveshja e Paqes e Dejtonit, fryma e saj u interpretua në mënyrë arbitrare, me imponimin e vendimeve nga të huajt, veçanërisht nga Christian Schmidt”.

Ata më tej mbrojnë veprimet e ndërmarra në Kuvendin e RS-së, duke pretenduar se ishin një reagim ndaj përndjekjes politike të Milorad Dodikut, duke thënë se “procedurat dhe vendimet e miratuara në Kuvend me qëllim të kthimit të kompetencave që i takojnë Republikës Serbe sipas Kushtetutës ishin përgjigje ndaj përpjekjes së ‘paligjshme’ për dënimin me burg të kryetarit të RS Milorad Dodik dhe për rrënimin e institucioneve të Republikës Serbe”.