Sopjani: Bandat i zgjodhën nacionalitetet e trupave të KFOR-it, nuk sulmuan amerikanët

Panelisti Shkëlzen Sopjani ka thënë në emisionin Pressing në T7 se turma më të mëdha u panë sot në protesta, në krahasim me të premten, pasi që shumica e tyre ishin në Beograd pasi i duheshin Vuçiqit.

“Të premten, grupet e rrezikshme kanë shkuar në Beograd, andaj sot pati më shumë protestues”, tha ai.

Ai tha se janë zgjedhur edhe kombësitë e trupave të KFOR-it, në mënyrë që të mos sulmohen amerikanët pasi reagimi do ishte më i madh.

“Nuk po shoh asgjë befasuese, as për mua e as për strukturat e sigurisë. E pamë se edhe janë zgjedhur nacionalitetet e trupave. Aty ku kenë amerikanët nuk pat reagime të dhunshme. Nuk lejuan të eskalojë situata pasi e dinin çfarë reagimi do të vinte”, shtoi ai.  

Sopjani shtoi se KFOR duhet të bashkëpunojë më shumë me policinë në menaxhimin e turmave.

“Këtu në Zveçan dhe në Zubin Potok, ka pasur më shumë probleme. Në Zubin Potok tani është zbrazur sheshi. Këta që i pamë janë të trajnuar mirë, e dinë çfarë bëjnë. Sic e shihni nuk janë qytetarë të thjeshtë. Problemi është se janë maskuar pasi një pjesë e madhe e tyre janë pjesë e strukturave të sigurisë në Serbi. Në veri kemi bashkëdyzim të madh në mes të krimit dhe strukturave të sigurisë. Janë të trajnuar. Mund të sulmojnë pa u lënduar. Kjo që e pash, kam pritur. Ajo që dua të them, është se KFOR-i pas bashkëpunuar me Policinë nuk mund të menaxhojnë turmat. Nuk e kan atë trajnim. Karabinierët po. Edhe policia. Këta nuk kanë këso përvoje. E pashë kordonin, nuk ishin të vendosur si duhet”, përfundoi ai.