“Slobodna Bosna” fshiu lajmin e rremë, Krasniqi: Të ketë përgjegësi, ose RTK e ka fundosjen të pakthyeshme

Mediumi boshnjak “Slobodna Bosna” ka fshirë pjesën e rremë ku akuzoi Nacionalen dhe Periskopin si gjoja mediumi të ofruara në shërbim të shtetit serb, për çka profesori Milazin Krasniqi reagoi duke kërkuar përgjegjësi nga Radio Televizioni i Kosovës që transmetuan atë në lajme qendror.

“RTK mund të rimëkëmbet vetëm nëse e adreson përgjegjësinë e abuzuesve të pafytyrë dhe nëse i rikthehet statusit të vet si transmetues publik. Nëse mbetet altoparlant i pushtetit, fundosjen mund të ketë të pakthyeshme”, ka shkruar Krasniqi.

Postimi i plotë:

Bëhet e ditur se portali “Slobodna Bosna” e ka fshirë pjesën e tekstit ku akuzonte portalet “Nacionale” dhe “Periskopi.” E ka fshirë nga frika e padisë. Është e qartë se e kanë fshirë në mungesë të fakteve. Ndërsa RTK vazhdon i patrazuar të mbrojë raportin e vet subverziv dhe nuk pranon ta adresojë përgjegjësinë.

Fshehja e raportit mbi përgjegjësinë në RTK për raportin subverziv kundër portaleve Nacionale e Periskopi, nuk e ndihmon me asgjë transmetuesin publik. Përkundrazi, ia zvogëlon gjithnjë e më shumë besueshmërinë, duke e paraqitur si peng në duart e pushtetit aktual. RTK nuk mbrohet duke mbrojtur shkelësit e standardeve etike dhe profesionale.

RTK mund të rimëkëmbet vetëm nëse e adreson përgjegjësinë e abuzuesve të pafytyrë dhe nëse i rikthehet statusit të vet si transmetues publik. Nëse mbetet altoparlant i pushtetit, fundosjen mund të ketë të pakthyeshme.