Sizmiologu jep detaje ç’po ndodh me situatën e tërmeteve në Shqipëri

Sizmiologu Edmond Dushi ishte këtë të premte i ftuar në Euronews Albania për të folur rreth tërmeteve. Një tërmet i fortë u ndie dy ditë më parë në Tiranë me magnitudë 4.4 ndërsa ditën e sotme ka pasur dy pasgoditje me magnitudë më të ulët.

Sipas Qendrës Sizmologjike Evropiane Mesdhetare EMSC tërmeti me magnitudë 4,1 i shkallës Rihter ishte me epiqendër në zonën e Fushë-Krujës.

Sizmologu tha se duke pasur parasysh historikun e tërmeteve pritet që pas tërmetit kryesor të ketë edhe goditje të tjera 18-20 ditë më pas.

“Ne kemi statistika gjithë përfshirëse në të gjithë territorin. Të gjitha seritë tërmetore që ndodhin në zonat perëndimore të vendit zgjasin më shumë se tërmetet në zonën qendrore. Kjo është tregues që do të kemi një zgjatje në vazhdim të kësaj serie tërmetesh. Pa përhapur panik, bazuar mbi të dhënat që ne kemi aktualisht nëse bëjmë llogaritjet mund të llogarisim diku te 18-20 ditë nga tërmeti kryesor i datës 24”,-tha sizmiologu.