Siguria në shkolla/ Policia dhe Prokuroria e Mitrovicës me kontrolle nëpër shkollat e mesme

Zyrtarë policorë të stacionit policor Mitrovicë Jugu, dje dhe sot kanë zbatuar masa dhe kontrolle sigurie në shkolla.

Me qëllim të parandalimit të bartjes dhe posedimit të mjeteve të rrezikshme dhe të kundërligjshme janë zbatuar masa sigurie përmes urdhër- kontrollit të lëshuar nga Gjykata Themelore në Mitrovicë, me ç‘rast janë kontrolluar nxënësit e katër shkollave të mesme të larta.

Policia ka bërë të ditur se gjatë kontrollimit brenda hapësirave të shkollave, tek nxënësit në posedim janë gjetur dhe sekuestruar: tri thika dhe dy boksa hekuri.

Lidhur me kontrollin në fjalë është deklaruar edhe Prokuroria Themelore e Mitrovicës.

“Prokuroria Themelore në Mitrovicë në bashkëpunim me Policinë e Kosovës,  në bazë të urdhëresës së lëshuar nga Gjykata kompetente,  gjatë dy ditëve me 04 dhe 05 nëntor kanë ushtruar urdhër kontroll nëpër të gjithë shkollat e mesme të Mitrovicës.

Zbatimi i këtij urdhër kontrolli ka qenë në kuadër të veprimeve dhe masave parandaluese për ofrimin e sigurisë në shkolla.

Prokurori i shtetit dhe policia mbeten të përkushtuar që edhe në të ardhmen të zbatojnë urdhër kontrolle të tilla, me qëllim të ofrimit të së sigurisë nëpër shkolla si dhe parandalimit të dukurive negative” thuhet në njoftimin e Prokurorisë.