Shpëtohet pas 94 orëve nën rrënoja një 17-vjeçar në Gaziantep, thotë se mbijetoi duke e pirë urinën e tij

Një adoleshent 17-vjeçar është nxjerrë i gjallë nga rrënojat e një ndërtese të shembur në qytetin turk, Gaziantep, në orët e para të së premtes, katër ditë pas tërmetit.

Para agimit, afër epiqendrës së tërmetit, punëtorët e shpëtimit e nxorën të riun Adnan Muhammed Korkut nga bodrumi ku ishte ngujuar që nga e hëna, raporton agjencia “Associated Press”.

I riu buzëqeshi para anëtarëve të familjes dhe shokëve që e brohorisnin emrin e tij, dhuronin duartrokitje dhe fshinin lot gëzimi, përderisa djaloshi po nxirrej i shtrirë në një barelë.

“Faleminderit Zotit që arrite”- tha ai, duke i përqafuar nënën dhe të tjerët që ishin përkulur për ta puthur e përqafuar, përderisa po dërgohej drejt një autoambulance. “Faleminderit të gjithëve”- u dëgjua duke thënë Adnani.

I ngujuar për 94 orë, por jo i shtypur, adoleshenti tha se është detyruar që ta pinte urinën e vet për ta shuar etjen.

“Kështu arrita që të mbijetoja”– tha ai.

“Kam një bir si ti. Të betohem, nuk kam fjetur katër ditë. Betohem se nuk kam fjetur. Po përpiqesha që të të nxirrja”– i tha atij një punëtor i kërkim-shpëtimit.