Shiti 13 futbollistë jashtë Kosovës, Ballkani krenohet me këtë rekord

Ballkani është skuadra e parë kosovare për nga numri i shitjeve të futbollistëve në arenën ndërkombëtare.

Tre herë kampioni i Kosovës, ka shitur plot 13 futbollistë gjatë viteve të fundit.

Lindon Emërllahu është futbollisti i fundit, i cili ditë më parë u shit për 800 mijë euro te skuadra rumune CFR Cluj.

Para tij nga Ballkani u larguan edhe yjet e tjerë si: Albion Rrahmani, Ermal, Krasniqi, Edvin Kuc, Meriton Korenica, Armend Thaqi, Lumbardh Dellova, Nazmi Gripshi, Qëndrim Zyba, Albin Berisha, Arbër Hoxha e Mirlind Daku.

Ballkani përmes një postimi në faqen zyrtare është krenuar me këtë sukses, ku thotë kur filluan këtë rrugëtim në vitin 2017, askush nuk e kishte besuar se do të arrihet ky sukses.

Postimi i plotë:

Pak kush mund të ketë besuar dikur, por ne ishim të vendosur, gjithmonë!

Rrugën që filluam ta shtrojmë nga viti 2017, e dinim se do të jetë e vështirë, e mbushur me sfida e sakrificë, por ne ishim të vendosur, gjithmonë!

Hap pas hapi, ditë pas dite, punuam pa rreshtur, hapëm dyert për talentët tanë, punuam me ta, ua shtruam rrugën e sigurt, duke ndërtuar një kala të pathyeshme, nga e cila do të do të fillonte epoka e lavdisë!

Brenda pak vjetësh, historia e futbollit shtetëror mori një kthesë të madhe ndërkombëtare, derisa klubi ynë u shndërrua në vatër të këtij suksesi të përvjetshëm.

Kombëtaret tona fituan futbollistë klasi nga puna jonë, derisa për yjet që krijuam, hapëm rrugë e mundësi evropiane.

Sot këta djelmosha të shkëlqyer, e prezantojnë më së miri angazhimin e secilit prej nesh, duke u shndërruar në protagonistë në shumë klube anë e kënd Evropës.

Faleminderit nga të gjithë!

Ashtu siç kemi bërë deri tani, do të vazhdojmë të ndërtojmë rrugë të reja, për suksese të reja e kampionë të rinj.

Ky është vetëm fillimi sepse pavarësisht çdo stuhie me të cilën mund të ballafaqohemi, ne jemi të vendosur, gjithmonë!