ShBA-ja e kërcënon “TikTok”-un me ndalim, nëse pronarët kinezë nuk i shesin aksionet

Administrata e presidentit Biden të ShBA-së e ka kërcënuar aplikacionin “TikTok” se do ta ndalojë përdorimin e tij në territorin e këtij shteti, nëse pronarët kinezë të rrjetit të njohur social nuk i shesin aksionet që i kanë në të, sipas disa raportimeve të mërkurën.

Kjo lëvizje, e raportuar së pari nga gazeta amerikane, “The Wall Street Journal”, është më dramatikja në një varg eskalimesh nga zyrtarët dhe ligjvënësit amerikanë, e nxitur nga frika se të dhënat e përdoruesve amerikanë mund t’i jepen qeverisë kineze, raporton gazeta“The Guardian”.

Aplikacioni është ballafaquar me masa edhe në vende të tjera të botës për shkak të frikës për spiunazh të mundshëm nga Kina. Britania e Madhe, Kanadaja dhe Australia rishtazi vendosën që ta ndalojnë këtë aplikacion në telefonat qeveritarë.

Shtetet e Bashkura tashmë e kanë ndaluar “TikTok”-un në pajise të qeverisë federale, por kjo është hera e parë gjatë pushtetit të administratës së Bidenit që lëshohet një kërcënim për ndalimin e përdorimit të këtij aplikacioni në mbarë vendin. Ish-presidenti Trump ishte përpjekur që ta merrte këtë vendim më 2020, por ishte bllokuar nga gjykatat.

Zëdhënësja e “TikTok”-ut, Brooke Oberwetter, i tha agjencisë “Reuters” se kompania ka kontaktuar së fundi me Komisionin për Investime të Jashtme, i udhëhequr nga Thesari i ShBA-së, i cili ka kërkuar që pronarët kinezë të aplikacionit t’i shesin aksionet e tyre, përndryshe kompania do të ballafaqohet me ndalim të mundshëm në ShBA.

“TikTok”-u është njëri prej rrjeteve sociale më të popullarizuara në botë dhe ka mbi 100 milionë përdorues vetëm në Shtetet e Bashkuara.