Sërish mblidhen protestuesit serbë në Zveçan

Në Zveçan janë mbledhur sërish protestuesit serbë, nën çadra të vendosura jo shumë larg kishës së Shën Gjergjit.

Ata sërish po këmbëngulin në kërkesat e tyre, që Forcat Speciale të Kosovës të largohen nga objekti i Komunës, që kryetari i sapozgjedhur Ilir Peci të mos lejohet të hyjë në objektin e Komunës së Zveçanit, si dhe lirimi i R.P dhe D.O., të cilët u arrestuan më 29 maj.

Përveç që ishte para ndërtesës së komunës, KFOR-i ishte vendosur në hyrje të Zveçanit nga drejtimi i Mitrovicës dhe në shkollën fillore “Vuk Karaxhiq”.

Ushtarët ndodhen në automjetet e tyre për shkak të kushteve të këqija atmosferike.

Dy automjete të Forcave Speciale të Kosovës janë parkuar prapa ndërtesës së komunës.