Senatorja amerikane paralajmëron: Ballkani Perëndimor është një nga vendet që Rusia mund të shkojë pas Ukrainës

Senatorja amerikane, Jeanne Shaheen, ka deklaruar se Akti mbi Demokracinë dhe Prosperitetin në Ballkanin Perëndimor kërkon rikthimin e vëmendjes së SHBA-së në rajon, pasi ndikimi rus ka një histori të gjatë.

Në një intervistë për Zërin e Amerikës, Shaeen e cila është një prej hartueseve të projektligjit, ka thënë se Akti synon të luftojë korrupsionin, për t’ju kundërvënë aktiviteteve destablizuese të Rusisë në Ballkanin Perëndimor.

Ajo shtoi se “nëse Rusia shqyrton se ku mund të shkojë pas Ukrainës, Ballkani Perëndimor është një nga vendet”.

“Rusia ka interes të përpiqet të shtojë tensionet që tashmë ekzistojnë, të përpiqet të promovojë konflikte. Dhe ndërsa Rusia shqyrton të shohë se ku mund të shkojë pas Ukrainës sigurisht që Ballkani Perendimor është një nga vendet. Nuk mund ta imagjinoj që dikush në botë, por veçanërisht në Evropë dhe në Ballkanin Perëndimor tek shikon atë që po ndodh në Ukrainë, të mendojë se do të donte që Rusia të ndërhynte dhe të bënte të njëjtën gjë në vendet e tyre”.