Sekreti për një mendje të shëndoshë – Antidepresanti natyral

Ka një sasi të pabesueshme mënyrash për të përmirësuar mirëqenien mendore, një prej tyre është aktiviteti fizik. Angazhimi i rregullt në stërvitje dhe aktivitet fizik është vërtetuar se ka efekte të thella pozitive në shëndetin mendor.

Gazeta Demos ka kontaktuar Partners in Diet për të diskutuar më thellë për benefitet e aktivitetit fizik, të cilat janë:

• Përmirësimi i humorit. Aktiviteti fizik nxit lirimin e endorfinave të cilat ngrisin humorin. Aktiviteti fizik gjithashtu rrit nivelet e serotoninës, një neurotransmetues i lidhur me lumturinë dhe mirëqenien. Rrjedhimisht, simptomat e depresionit dhe ankthit reduktohen dhe kemi ngritje të humorit.
• Përforcimi i qëndrueshmërisë emocionale. Duke u angazhuar me aktivitet fizik fitohet një ndjenjë e arritjes, e cila përmirëson vetëbesimin e një individi. Për më tepër, stërvitja konstante shërben si rrugëdalje e shëndetshme për stresin dhe emocionet negative.
• Përmirësimi i funksionit të trurit. Aktiviteti fizik rrit rrjedhjen e gjakut në tru, duke nxitur rritjen e neuroneve të reja dhe duke rritur funksionin kognitiv. Gjithashtu ndikon në përmirësimin e fokusit dhe koncentrimit.
• Përmirësimi i gjumit. Gjumi i mirë është jetik për shëndetin mendor dhe aktiviteti fizik përmirëson cilësinë dhe kohëzgjatjen e gjumit.
• Zvogëlon ndjesinë e të qenurit i zemëruar dhe në presion

Përveç efektive pozitive në shëndetin mendor, aktiviteti i rregullt fizik poashtu ul rrezikun e vdekjes nga sëmundjet kardiovaskulare, ul rrezikun e infarktit dhe goditjes në tru, ul rrezikun për zhvillimin e diabetit dhe ngrit sensin e produktivitetit.

Këto efekte nuk janë vetëm tranzitore por qëndrojnë në periudha kohore afatgjatë.

Si konkluzion, efektet pozitive të aktivitetit fizik, si për shëndetin fizik, poashtu dhe atë mental, janë të padiskutueshme.