Sekretari i Degës së LDK-së në Vushtrri: S’kam lidhje për keqpërdorim me vota, jam i hapur për çdo hetim

Sekretari i Degës së LDK-së në Vushtrri, Betim Grabanica, përmes një reagimi ka mohuar raportimet se ka manipuluar votat për kandidatët për deputetë gjatë procesit të numërimit.

Ai përmes një postimi në Facebook thotë se është i hapur për çdo hetim.

“Nuk jam ftuar as nga policia dhe as nga prokuroria, por jam i gatshëm të ndihmoj organet kompetente që e vërteta të dalë në shesh”, ka shkruar ai në Facebook.

Ai shton se nuk ka asnjë lidhje me raportimet në disa media për keqpërdorim, që sipas tij kanë për qëllim të zhvendosin vëmendjen dhe të fshehin keqpërdorimet që kanë ndodhur ditën e votimit, të cilat pohon se i kanë zbuluar sot, duke evidentuar fletëvotimet e pavulosura dhe ndërhyrjet në librin e votuesve, të cilat ngjallin dyshime për fenomenin e njohur si “treni bullgar”, shkruan Reporteri.net.

Tutje ai shton se tre kandidatët e LDK-së nga Vushtrria kanë vota përafërsisht të njëjta nga numërimi deri më tani, ndërsa shton se asnjë votë e asnjë kandidati nuk është prekur dhe nuk do të lejohet të preket.

Reagimi i tij i plotë:

Sot kam qenë kryesues në Qendrën e Votimit 2709/01 në Vushtrri. Pas hasjes së një fletëvotimi të pavulosur, menjëherë kemi ndërprerë procesin e numërimit dhe kemi njoftuar personat përgjegjës të KKZ-së, pasi sipas rregullave të KQZ-së, në momentin kur haset një votë e parregullt, i gjithë procesi i numërimit kthehet në pikën zero.

Raste të tilla të fletëvotimeve të pavulosura ka pasur edhe në të paktën dy tavolina të tjera vetëm sot në Vushtrri. Sipas informacioneve që kemi, edhe atje procesi i numërimit është kthyer nga fillimi.

Për këtë arsye, të gjithë komisionerët e tavolinës nr. 2709/01 kemi hartuar raport/procesverbal sipas rregullave të KQZ-së.

Nuk kam asnjë lidhje me raportimet në disa media për keqpërdorim. Ato janë lajme të rreme dhe kanë për qëllim të zhvendosin vëmendjen dhe të fshehin keqpërdorimet që kanë ndodhur ditën e votimit, të cilat ne i kemi zbuluar sot, duke evidentuar fletëvotimet e pavulosura dhe ndërhyrjet në librin e votuesve, të cilat ngjallin dyshime për fenomenin e njohur si “treni bullgar”. Të gjitha këto raste janë raportuar në KKZ.

Gjithashtu, në një qendër votimi në Bahri Haxha, 2701/05, ka pasur ndërhyrje në listën e nënshkrimeve të votuesve, ku me laps kimik janë fshirë emrat dhe numrat personalë të votuesve, por kanë mbetur nënshkrimet e tyre. Edhe ky rast është raportuar në KKZ, dhe edhe këtu numërimi është kthyer në pikën zero, pasi është hasur një fletëvotim i pavulosur.

Po ashtu, sistemi i KQZ-së ka qenë jofunksional, duke shkaktuar stres te të gjithë komisionerët.

Tre kandidatët e LDK-së nga Vushtrria kanë vota përafërsisht të njëjta nga numërimi deri më tani, prandaj asnjë votë e asnjë kandidati nuk është prekur dhe nuk do të lejojmë të preket.

Jam i hapur për çdo hetim. Nuk jam ftuar as nga policia dhe as nga prokuroria, por jam i gatshëm të ndihmoj organet kompetente që e vërteta të dalë në shesh.

Do të mbrojmë votën e qytetarëve dhe nuk i nënshtrohemi asnjë presioni.
Me respekt,
Betim Grabanica
Sekretar i Degës së LDK-së, Vushtrri