Sami Lushtaku reagon për shkarkimin e Fadil Kodrës: Turpi iu mbuloftë, proserbët po qeverisin me Kosovën

Nënkryetari i Komunës së Skenderajt, Sami Lushtaku ka reaguar për shkarkimin e sotëm të bashkëluftëtarit të tij e të Komandantit Legjendar Adem Jashari, Fadil Kodra, shkruan GazetaDemos.

Lushtaku e ka quajtur të turpshëm këtë veprim nga ana e Qeverisë së Kosovës, e më konkretisht të ministrit të Punëve të Brenshme, Xhelal Sveçla.

“Duket që kjo qeveri e turpit ka aq shumë antipati ndaj UÇK-së, sa askush nuk mund të imagjinonte se veprimet e saj do të bien deri në këtë nivel. Nuk ka turp më të madh sesa të shkarkohet nga pozita e Drejtorit të Agjencionit të Emergjencave, një njeri si Fadil Kodra, që gjithë jetën e ka vënë në shërbim të kombit”, ka shkruar ai mes tjerash.

Reagimi i plotë i tij:

I turpshëm e skandaloz lajmi se është shkarkuar nga pozita e Drejtorit të Përgjithshëm të Agjencisë së Emergjencave të Kosovës, njëri prej themeluesve të UÇK-së, pjesëtar i grupit të Komandantit Legjendar Adem Jashari, luftëtar i dalluar i UÇK-së, Gjenerali Fadil Kodra.
Duket që kjo qeveri e turpit ka aq shumë antipati ndaj UÇK-së, sa askush nuk mund të imagjinonte se veprimet e saj do të bien deri në këtë nivel. Nuk ka turp më të madh sesa të shkarkohet nga pozita e Drejtorit të Agjencionit të Emergjencave, një njeri si Fadil Kodra, që gjithë jetën e ka vënë në shërbim të kombit.
Duket që ka ardhë koha e proserbëve e nostalgjikëve të Jugosllavisë që të qeverisin me institucionet e Kosovës.
Turpi ju mbuloftë!
SL