Salih Mustafa refuzoi ta nënshkruante deklarimin e pasurisë, sipas urdhrit të Speciales për kompensimin e viktimave

Ish-eprori i UÇK-së, Salih Mustafa, ka refuzuar ta deklarojë pasurinë e tij në Hagë.

Si rezultat, ai ka shkelur urdhrin e Dhomave të Specializuara të Kosovës.

“Gjykatësi i Vetëm: KONSTATON se z. Mustafa ka shkelur një urdhër të mëparshëm gjyqësor duke refuzuar të plotësojë Formularin e deklarimit të mjeteve”, thuhet në vendim.

Si rezultat, më 16 korrik 2025, gjykatësi i vetëm Biti lëshoi vendimin në lidhje me zbatimin e urdhrit për zhdëmtim në çështjen Salih Mustafa.

Gjykatësi konstatoi se Mustafa nuk ka përmbushur detyrimet e tij sipas urdhrit për zhdëmtim dhe urdhëroi që të llogaritet norma vjetore e interesit mbi shumën e papaguar të zhdëmtimit.

Kjo normë e interesit do të llogaritet nga data kur vendimi i dorëzohet Mustafës dhe do të vazhdojë derisa urdhri për zhdëmtim të zbatohet plotësisht.