Sa shpesh duhet të pastrojmë flokët?

Prej vitesh ka pasur debate se sa shpesh duhet t’i lajmë flokët dhe nëse është e keqe t’i lani ato çdo ditë.

Ndërsa ka shumë këshilla për orarin ideal të larjes duke filluar nga çdo ditë deri në një herë në disa javë, dermatologët thonë se gjithçka varet nga lloji i flokëve tuaj. Sipas tyre, në të vërtetë nuk ka një përgjigje të saktë.

“Sa shpesh dhe kur gjatë ditës do të ishte më mirë të lani flokët varet në radhë të parë nga gjendja e flokëve, por edhe nga aktivitetet me të cilat merret personi. Por një gjë është e sigurt, pastrimi i flokëve dhe kokës është jashtëzakonisht i rëndësishëm. Folikulat e flokëve, të cilat janë të rrethuara nga qelizat e lëkurës dhe gjëndrat e yndyrës, ndihmojnë që flokët tuaj të rriten”, shpjegon dermatologu Gary Goldenberg për Yahoo.

Këto gjëndra vaji prodhojnë sebum që ushqen natyrshëm flokët për t’i mbajtur ato të shëndetshme dhe të mëndafshta.

Megjithatë, ajo është pjesërisht përgjegjëse edhe për yndyrën e flokëve ndërmjet dy larjeve dhe kontribuon në formimin e zbokthit, e shpesh edhe në ndjenjën e kruajtjes së pakëndshme.

Edhe pse asnjëherë nuk është konfirmuar se larja e përditshme e flokëve është e dëmshme për shëndetin e tij, fakti është se trajtimi i tepërt mund të shkaktojë tharje të lëkurës së kokës dhe acarim në lëkurën e kokës.

Kjo është pikërisht arsyeja pse shumica e dermatologëve rekomandojnë që, nëse është e mundur, të mos i lani flokët çdo ditë dhe nëse duhet të përdorni shampo natyrale që nuk përmbajnë sulfate të dëmshme.

Sipas Akademisë Amerikane të Dermatologjisë, sa shpesh i lani flokët duhet të bazohet në sasinë e vajit që prodhon skalpi juaj. Pra, shpjegojnë ata, për personat që kanë skalp të yndyrshëm, është alternativa më e mirë që t’i lajnë flokët më shpesh, madje edhe çdo ditë, sesa për ata, skalpi i të cilëve tashmë është i thatë dhe i ndjeshëm.

“Megjithatë, nëse keni flokë të thatë ose skalp të ndjeshëm, sigurisht që mund ta shtyni larjen e flokëve sipas nevojës. Disa njerëz i lajnë flokët çdo ditë, ndërsa të tjerë i lajnë çdo një deri në dy javë. Gjithçka është çështje preferencash personale”, thotë dermatologu Joshua Zeichner.

Dermatologët paralajmërojnë gjithashtu se disa njerëz shpesh përdorin shumë shampon kur lajnë flokët.

“Në vend që thjesht të heqin dhjamin që është formuar në lëkurën e kokës, ata e teprojnë dhe fjalë për fjalë thajnë flokët dhe madje i thyejnë nëse majat janë tashmë të dëmtuara dhe të holla”, shpjegon Goldenberg.