Rutte për mesazhin që Trump e publikoi: Krejtësisht në rregull, është fakt

Shefi i ri i NATO-s, Mark Rutte, ka reaguar pas publikimit të një mesazhi privat lavdërues nga Presidenti amerikan Donald Trump, i cili u bë publik teksa ky i fundit po udhëtonte drejt Evropës për samitin e NATO-s në Hagë.

Rutte ka konfirmuar se nuk ka asnjë problem me publikimin e mesazhit dhe madje e ka cilësuar atë si të bazuar në fakt.

“Ajo që i thashë në mesazh, është krejtësisht në rregull që ai e publikoi,” tha Rutte teksa samiti po fillonte në Hagë. “Mendoj se është fakt.”

Pyetur nga një gazetar nëse ndjehej në siklet që një mesazh privat doli në publik, Rutte ishte i prerë:

“Absolutisht jo,” tha ai.

“Ajo që është në atë mesazh është një deklaratë faktike dhe jam plotësisht në rregull që ai e ndau.”.

Në mesazhin që Trump e postoi në rrjetin e tij Truth Social, Rutte e lavdëronte presidentin për presionin që i kishte bërë aleatëve të NATO-s për të rritur buxhetet ushtarake.

“Ti do të arrish diçka që asnjë president amerikan prej dekadash nuk ka mundur ta realizojë. Evropa do të paguajë në mënyrë të MADHE, ashtu siç duhet, dhe kjo do të jetë një fitore për ty,” shkroi Rutte.

Por ndërsa lavdërohej për qëndrimin e tij të ashpër ndaj anëtarëve të tjerë të aleancës, Trump nuk shprehu mbështetje të plotë për nenin 5 të traktatit të NATO-s, që parashikon mbrojtje kolektive në rast sulmi ndaj njërit prej anëtarëve.

Rutte, megjithatë, nuk u shqetësua nga qëndrimi i Trump-it dhe u shpreh i bindur për angazhimin amerikan ndaj NATO-s.

“Për mua ka qartësi të plotë që Shtetet e Bashkuara janë plotësisht të angazhuara ndaj NATO-s, plotësisht të angazhuara ndaj nenit 5, dhe po — ekziston edhe një pritshmëri, që do të përmbushet sot — që kanadezët dhe evropianët do të përshpejtojnë shpenzimet e tyre,” tha ai të mërkurën.