Rrustemi akuzon sistemin e drejtësisë: Kryeshefat publik po ballafaqohen me keqpërdorime të instaluara me dekada

Deputetë të Lëvizjes Vetëvendosje, edhe sot i kanë dalë në mbrojtje kryeshefit të arrestuar të KEK-ut, Nagip Krasniqi.

Ata këtë e kanë bërë edhe në seancën e Kuvendit të Kosovës.

Deputeti i Lëvizjes Vetëvendosje, Adnan Rrustemi, duke folur për arrestimin e Krasniqit ka thënë se kryeshefat e ndërmarrjeve publike po ballafaqohen me keqpërdorime të egra dhe po i bëjnë ballë krimit të organizuar “që është instaluar brenda këtyre ndërmarrjeve me dekada”.

“Lidhur me atë që u tha për Nagip Krasniqin, nuk ka asnjë rëndësi se a është apo nuk është anëtar i Lëvizjes Vetëvendosje. Nagip Krasniqi është një nga profesionistët e Kosovës. Shumë kryeshefa ekzekutiv po ballafaqohen me keqpërdorime të egra dhe po i bëjnë ballë krimit të organizuar që është instaluar brenda këtyre ndërmarrjeve me dekada”, tha Rrustemi nga foltorja e Kuvendit.

Sipas Rrustemit, gjendja në sistemin e drejtësisë është e rëndë, pasi organi i akuzës nuk po i trajton dosjet e dorëzuara nga ministritë.

“Organi i akuzës vazhdon avazin e vjetër, tashmë në trajtë tjetër. Nëse dikur rehabilitonte korrupsionin duke e trajtuar si kundërvajtje përmes aktakuzave qëllimisht të dobëta e jokoherente, tanimë nuk trajton qindra dosje të dorëzuara nga institucione të ndryshme për keqpërdorime me miliona euro”, tha Rrustemi.

Tutje Rrustemi tha se përpjekja e opozitës për ta paraqitur LVV-në “si veten”, është e dëshpëruar dhe e pashpresë.

“Për të tjerat që lidhen me ngjarjen e djeshme zoti Krasniqi do të përgjigjet vetë dhe do ta kuptojmë të gjithë të vërtetën, por përpjekja juaj për ta paraqitur Vetëvendsojen si vetën tuaj, është e dëshpëruar dhe e pashpresë”, është shprehur ai.

Kryeshefi i KEK-ut, Nagip Krasniqi i është arrestuar dje me urdhër të Prokurorisë Speciale.

Ai sipas Prokurorisë, është arrestuar për shkak të dyshimit se ka kryer veprat penale “Keqpërdorimi i pozitës apo autoritetit zyrtar” , “Ushtrimi i ndikimit” dhe “Konflikti i interesit”.

Krimet Ekonomike bastisën zyrën e Krasniqit në Prishtinë, si dhe dy banesa në pronësi të tij, ku kanë sekuestruar dokumente të ndryshme që lidhen me rastin.