Cristiano Ronaldo është në pozitë të mirë për ta fituar “Këpucën e Artë” në “Euro 2020”, pavarësisht se është eliminuar me Portugalinë në 1/8 e finales.
Ylli portugez ka shënuar pesë gola në katër ndeshje për Portugalinë duke bërë edhe një asistim.
Konkurrenti më i madh i Ronaldos, çeku Patrik Schick, ka shënuar pesë gola po ashtu. Ai është eliminuar me Çekinë në çerekfinale nga Danimarka.
Pavarësisht se të dy kanë shënuar nga pesë gola, Ronaldo është përpara për shkak të asistimit të tij. Schick nuk regjistroi asnjë asistim.
Romelu Lukaku i Belgjikës, Karim Benzema i Francës dhe Emil Forsberg i Suedisë kanë nga katër gola, por janë eliminuar tashmë.
Sfiduesit më të afërt të Ronaldos janë Raheem Sterling, Harry Kane dhe Kasper Dolberg, të cilët kanë shënuar nga tre gola. Kanë mbetur të luhen gjysmëfinalet dhe finalja.