Reuters: Dodik i dorëzohet drejtësisë, hiqet urdhri i arrestit pasi u paraqit në seancë dëgjimore

Zyra e Prokurorit të Bosnjës dhe Hercegovinës ka njoftuar se ka hequr urdhrin e arrestit kundër liderit serb të Republikës Sërpska, Milorad Dodik, pasi ky i fundit është paraqitur papritur në një seancë dëgjimore lidhur me akuzat për shkelje të rendit kushtetues të vendit.

Pas muajsh refuzimi për t’iu përgjigjur thirrjeve zyrtare, Dodik u paraqit të premten para autoriteteve, çka bëri që urdhri i mëparshëm për arrestimin e tij të tërhiqej.

Së bashku me kryeministrin Radovan Vishkoviq dhe kryetarin e Kuvendit Popullor të Republikës Sërpska, Nenad Stevandiq, Dodik akuzohet për përpjekje për ndryshim të rendit kushtetues, përmes një draft-kushtetute që synonte shpalljen e pavarësisë së Republikës Sërpska dhe themelimin e ushtrisë së saj.

Sipas Kodit Penal të Bosnjës dhe Hercegovinës, për këto vepra parashihen deri në pesë vjet burg dhe ndalim i ushtrimit të funksioneve publike.

Dorëzimi i Dodik para drejtësisë u raportua edhe nga agjencia Reuters, e cila e cilëson këtë veprim si një lëvizje e papritur nga lideri separatist serb.