Albanian
Croatian
English
French
German
Serbian
Turkish
Rreth 7.15 milionë vizitorë të huaj kanë hyrë në Shqipëri deri në muajin nëntor, duke shënuar rekord krahasuar me të gjitha vitet e kaluara.
Nga kjo shifër, sipas INSTAT, 6.7 milionë erdhën për pushime apo vizitë tek të afërmit, një rritje 30 për qind më shumë se gjatë 2021-it.
Shqipëria konfirmohet edhe njëherë në këtë mënyrë si një nga destinacionet që patën rritjen më të madhe të turizmit pritës gjatë këtij viti, pavarësisht krizës.
Çmimet relativisht të ulëta dhe shtimi i linjave direkte ajrore, shihen si disa nga faktorët kryesorë, që kanë ndikuar në rritjen me 3.7 herë të turistëve nga Spanja, dyfishimin e atyre nga Anglia, por edhe rritje të ndjeshme nga Italia. Por sërish, janë shqiptarët nga Kosova ata që mbajnë peshën kryesore të turizmit në vend.
Të dhënat e Institutit të Statistikave tregojnë se edhe në muajin nëntor ka pasur një numër të konsiderueshëm hyrjesh drejt vendit tonë, ku një dominim duket se e kanë dhënë shtetasit nga Kosova edhe si efekt i festave të nëntorit.
Konkretisht, hyrjet e shtetasve shqiptarë dhe të huaj në territorin shqiptar, në muajin nëntor 2022, janë 808,813. Ky tregues rezulton me një rritje 47.4 për qind, krahasuar me nëntor 2021.
Në nëntor 2022, numri i shtetasve të huaj që kanë hyrë në territorin shqiptar është 358,350. Ky numër është rritur me 46.8 për qind, krahasuar me nëntor 2021 ndërkohë që është 34 për qind më i lartë edhe në raport me vitin 2019 kur turizmi ishte në normalitet pa pandeminë e COVID-19.
Suksesi konfirmohet edhe në shpenzime, teksa sipas Bankës së Shqipërisë të ardhurat nga të huajt u regjistruan në 2.2 miliardë euro në 9 muaj.
Rekord ndërkohë edhe për daljet e shqiptarëve jashtë vendit. 5.2 milionë është numri i lëvizjeve jashtë kufijve të regjistruara. Një pjesë e mirë për turizëm, por edhe një numër i madh për arsye emigrimi, gjykuar nga statistikat paraprake të azilkërkuesve në vendet e Bashkimit Europian, emigrantëve të rregullt, por edhe klandestinëve në Britaninë e Madhe.