Reagon Albulena Haxhiu: Pacollit detyrohemi t’ia kthejmë paratë e tij, s’ka teori që ai ta marrë pronësinë e Grandit

Albulena Haxhiu, ministre e Drejtësisë, ka reaguar pas një postimi të bërë nga biznesmeni Behgjet Pacolli, pasi ky i fundit tha se kompania e tij ‘‘Mabco Contsruction’’, e ka fituar në arbitrazh rastin ‘‘Grandi’’.

Haxhiu, në postimin e saj ka thënë se e ‘‘vetmja gjë’’ për të cilën Kosova detyrohet të ia kthejë Pacollit, janë paratë të cilat biznesmeni ‘‘ia kishte dhënë AKP-së në emër të privatizimit’’.

Po ashtu, Haxhiu ka thënë se nuk ‘‘ekziston asnjë premisë, dëshmi apo teori që do t’ia mundësonte Behgjet Pacollit pronësinë mbi Grandin’’.

Postimi i plotë:

Grandi mbetet në pronësi të Republikës së Kosovës

Republika e Kosovës, sipas Vendimit të Qendrës Ndërkombëtare për Zgjidhjen e Kontesteve Investimeve, ka gjetur që nuk ekziston asnjë premisë, dëshmi apo teori që do t’ia mundësonte Behgjet Pacollit pronësinë mbi Grandin. E vetmja gjë për të cilën obligohet Republika e Kosovës, është kthimi i vlerës monetare të cilën Pacolli ia kishte dhënë AKP-së në emër të privatizimit. Edhe pse ai nuk ishte palë në procedurë, AKP kishte pranuar mjetet e tij. Këto tani ne detyrohemi t’i kthejmë.

Për shkak të hajnisë 20 vjeçare nëpër institucione shtetërore, paguajmë pasoja ende. Por këto janë të fundit. Pronësinë mbi pronën publike nuk ia lejojmë askujt. Prandaj Grandi mbetet i Kosovës e i qytetarëve të saj.