Rasti në Pejë, Tahiri: Po të kishte Kurti karakter do jepte përgjegjësi, i ftohtë e pa kurrfarë ndjeshmëri

Shefi i Grupit Parlamentar të PDK-së, Abelard Tahiri ka thënë se po të kishte Kryeministri Kurti karakter, ai do të jepte përgjegjësi për rastin me foshnjën e pajetë në spitalin e Pejës, shkruan Gazeta Online Reporteri.net.

Në një reagim në Facebook, Tahiri shkruan se Kurti jo vetëm që nuk dha përgjegjësi e shpjegim, por siç thotë ai, kreu i ekzekutivit ishte edhe i ftohtë e pa kurrfarë ndjeshmërie.

“Tani bëhen tre muaj që Kosova është pa ministër të shëndetësisë. Çfarë papërgjegjësie!!!”, shkruan mes tjerash Tahiri në Facebook.

Statusi i plotë:

Të tronditur nga një skandal i thellë papërgjegjësie që ndodhi në Spitalin Rajonal të Pejës, deputetët e opozitës i kërkuan kryeministrit Kurti që të japë shpjegime, megjithëse po të kishte karakter, ai do të duhej të jepte përgjegjësi, ndërsa ai, jo vetëm që s’dha kurrfarë shpjegimi e përgjegjësie, por me një ftohësi pa kurrfarë ndjeshmërie i injoroi deputetët, duke mos thënë as edhe një fjalë të vetme për këtë rast e skandal të rëndë.

Tani bëhen tre muaj që Kosova është pa ministër të shëndetësisë. Çfarë papërgjegjësie!!!