Rama: Tash e tutje aktivitetet kulturore do të mbahen në skenën e krijuar në Pallatin e Rinisë

Kryetari i Prishtinës, Përparim Rama, ka thënë se tash e tutje koncertet, festivalet, dhe shfaqjet e ndryshme do të realizohen në skenën e re të krijuar në Pallatin e Rinisë.

Në një postim në Facebook, Rama ka shkruar se për këtë është dakorduar edhe drejtori i RTK-së dhe kryeshefja e Ekzekutive e Pallatit të Rinisë.

Tutje ai ka thënë se kryeshefja ekzekutive, Mrika Gashi i ka njoftuar se ambientet e Pallatit po pastrohen dhe po intervenohet aty ku ka nevojë emergjente.

“Koncerte, festivale, shfaqje të ndryshme, të gjitha këto do të realizohen tash e tutje në skenën e re të krijuar në ish sallën e djegur të Pallati i Rinisë. Ky institucion u përket qytetarëve, artistëve, sportdashësve e të gjithëve që duan të shprehin talentin e tyre në këtë skenë. Me këtë u pajtuan drejtori i RTK-së, Shkumbin Ahmetxhekaj bashkë me ekipin fantastik të skenografeve, gjatë vizitës që i bëmë hapësirave të Pallatit. Mrika Gashi, kryeshefja ekzekutive e kësaj ndërmarrjeje publike të Kryeqytetit, na informoi se ambientet e Pallatit çdo ditë e më shumë po pastrohen dhe po intervenohet aty ku ka nevojë emergjente”, ka shkruar Rama.