Rama pyetet pse po i referohet Hashim Thaçit si president kur Kosova tani ka presidente Vjosa Osmanin: Kjo është përgjigja e tij

Kryeministri i Shqipërisë Edi Rama ka thënë se nuk po nënçmon presidenten e Kosovës Vjosa Osmani, kur po i referohet me president e jo ish’president Hashim Thaçit.

Kryeministri Rama dje gjatë vizitës te familja e ish’presidentit Hashim Thaçi, të njëjtit i referohej si president dhe dikush këtë e kuptoi si adresim edhe Vjosa Osmanit, duke lënë të nënkuptohet se ai nuk po i njihte atë si presidente, shkaku edhe i raporteve jo shumë të mira në mes tyre, sidomos pas publikimit të një fotografie nga ana e presidentes Osmani, ku Ramën e shfaq me gjysmë trupi.

Por Rama e ka mohuar këtë, duke thënë Thaçit i referohet si president dhe jo si ish’president, pasi një praktikë e tillë përdoret në vendet më të zhvilluara demokratike të botës, dhe edhe ai vepron njëjtë.

“Së pari mendoj se duhet ta hedhim të gjithë së bashku këtë hap drejtë shoqërive të zhvilluara shëndetshëm nga pikëpamja demokratike, të cilat termin ish’president apo ish’kryeministër nuk e përdorin. Nëse ju do të shikoni se si i drejtohen presidentëve në Amerikë në Francë, apo kryeministrave në Angli e Itali, do të shikoni se i drejtohen gjithmonë presidenti Bush, presidenti Obama, presidenti Karter dhe kështu me radhë”.

Rama tha se kur Thaçit i referohet si president, këtë nuk e bën sepse nuk e din se kush është presidente e Kosovës aktualisht. Ai madje tha se Vjosa nuk i ka problemet e Thaçit, dhe i uron shëndet e lumturi, pa tendencën për ta nënçmuar apo anashkaluar.
“Kështu që kur unë them presidenti Thaçi kjo nuk nënkupton se unë nuk e di se cila në këtë rast është presidentja e Kosovës. Nga ana tjetër Vjosa gëzon shëndet të plotë, nuk ka probleme me Gjykatën e Hagës, kështu që unë i urojë shëndet e lumturi dhe nuk kam asnjë arsye që kur i adresohem Hashimit të nënkuptoj se po nënçmoj apo po anashkaloj presidenten aktuale të Republikës së Kosovës”, tha Rama