Qeveria do ta ndihmojë Telekomin me 1 milion euro për shtrirje të internetit në veri

Ministrja e Ekonomisë, Artane Rizvanolli ka folur sot në një konferencë për media pas vizitës në Telekom.

Mes tjerash, teksa flite për ndihmat që qeveria synon t’i bëjë brenda periudhave të caktuara, ka shtuar se nga viti i ardhshëm Vala do të jetë e Kosovës dhe jo e Monakos.

Veç kësaj, janë paraparë edhe 13 milionë shtesë për ta ndihmuar kodin telefonik të Kosovës.

“Për periudhën e tanishme, pra të menjëhershme, jemi duke shikuar mundësitë që të ndihmojmë Telekom-in për të përballuar investimet kapitale për shtrirjen e rrjetit në komunat veriore të Kosovës. Në vlerë prej rreth 1 milion euro, kjo është diçka që do të tentojmë të bëjmë brenda javëve në vijim.

Ndërsa, sa i përket vitit të ardhshëm, po flasim për një shumë prej 13 milionë eurove. Kjo kuptohet, do të shfrytëzohet nga Telekomi. Sigurisht që këto duhet të kombinohen zyrtarisht dhe proceduralisht, mirëpo vullneti politik ekziston që Telekomi të mbështetet me më së paku 13 milionë euro për migrimin në kodin telefonik të Kosovës nga kodi i Monakos, si dhe modernizimin e rrjetit”, ka thënë ndër të tjerash Rizvanolli para gazetarëve.