Qëndron Kastrati: Autoritetet serbe më pyetën “a e njeh Fatmir Limajn”

Ish kryetari i Kamenicës, Qëndron Kastrati, ka thënë detaje për ndalesën nga autoritetet serbe më 13 gusht të këtij viti, derisa po kalonte transit nëpër Serbi.

Kastrati ai ka treguar se gjatë ndalimit, i janë bërë pyetje politike, mirëpo thotë se ka refuzuar të përgjigjet.

“Kanë thënë se duhet me prit se dikush do të vijë dhe të ju intervistojë. Pas kësaj kanë ardhur dy persona civilë – nuk kanë pasur ndonjë shenjë identifikuese. Më kanë kërkuar ta fik telefonin, pastaj më kanë bërë pyetje politike. Në asnjë moment nuk është diskutuar se pse po kaloj nëpër shtetin e Serbisë”, tha Kastrati për Klan Kosova.

Gjithashtu, ai thotë se është pyetur edhe rreth largimit nga Lëvizja Vetëvendosje dhe se a e njeh liderin e Nismës Socialdemokrate, Fatmir Limajn.

“Jam pyetur ‘pse je larguar nga Lëvizja Vetëvendosje’ ose ‘a e njeh personalisht Fatmir Limajn’”, tregon Kastrati.

Ai tha se ka refuzuar të iu përgjigjet këtyre pyetjeve duke thënë se ai i di të drejtat e tij dhe së këto pyetje nuk janë relevante.

“Pas 30 minutash, sërish tentonin të hyjnë në tema politike. Unë sërish kam refuzuar. Pastaj pas 30 minutash kanë provuar edhe një herë – kjo si duket ishte si strategji e tyre për ta parë nëse jam i gatshëm të flas më shumë. Unë kam kërkuar që të prezantohet urdhri i prokurorit dhe arsyeja se pse i është pamundësuar të kalojë nëpër Serbi. Ata ma kanë dhënë një dokument që shkruhej në cirilik të cilin shkrim unë nuk e njoh”, tha Kastrati.