Pushohen hetimet ndaj Gent Tiganit – ishte arrestuar dhe paraburgosur për veprën penale të dhunimit

Janë pushuar hetimet për Gent Tiganin, i cili ishte raportuar në korrikun e vitit të kaluar se kishte dhunuar një vajzë në pyll.

Sinjali ka siguruar dokumentin zyrtar të Prokurorisë Themelore në Pejë, me të cilin zyrtarisht pushohen hetimet penale kundër Gent Tiganit, i cili më herët ishte arrestuar dhe ndodhej në paraburgim si i dyshuar për veprën penale të “Dhunimit” nga neni 227 paragrafi 4.2 i Kodit Penal të Republikës së Kosovës.

Në dokumentin me numër PP/I nr. 53/24, të datës 1 korrik 2025, Prokuroria bën të ditur se:

“Hetimet pushohen sepse nuk ekziston dyshimi i arsyeshëm se i pandehuri kishte për ta kryer këtë vepër penale.”

Sipas aktvendimit, hetimet kishin nisur më 13 korrik 2024, pas kallëzimit të bërë nga S. A. K e cila kishte raportuar se kishte pasur marrëdhënie seksuale me Gent Tiganin, e që më pas ishte cilësuar si vepër penale e dhunimit.

Pas një viti hetimesh dhe veprimesh hetimore, përfshirë ekzaminimin klinik, mjeko-ligjor dhe ADN-së, Prokuroria ka konstatuar se nuk ka prova të mjaftueshme për të mbështetur dyshimin penal ndaj të pandehurit.

Me këtë vendim, Gent Tigani shfajësohet nga akuza më e rëndë që kishte rënduar mbi të dhe rasti konsiderohet i mbyllur, përderisa nuk paraqiten fakte të reja.