Albanian
Croatian
English
French
German
Serbian
Turkish
Luljeta Pula, profesoreshë dhe veprimtare e çështjes kombëtare, ka rrëfyer për kontributin e amerikanes Eva Brantley, doktor shkence e çështjes së të drejtave të njeriut, në ditën e shpalljes së Deklaratës Kushtetuese të 2 Korrikut, 1990.
Pula ka shkruar se Brantley se më 1 korrik kishte mbërritur në Kosovë nga Amerika, duke kërkuar që më 2 korrik, të dilnin para Kuvendit dhe të lejohej shpallja e Deklaratës.
“Meqë regjimi nuk lejonte futjen e delegatëve në Kuvend, ata hezitonin të bënin shpalljen e Deklaratës së Pavarësisë jashtë ndërtesës së Kuvendit. Juristët e Parlamentit nuk e dinin a do të jetë ajo valide nëse shpallet jashtë objektit. Eva ftoi tri here me radhë sekretarin e Kuvendit dhe i tha qe të fillonin shpalljen e Deklaratës dhe i siguroi që ajo do të jetë valide. Sapo u kishte thënë herën e trete, delegatët filluan shpalljen dhe neve të dyjave na arrestuan”, shkruan profesoresha Pula në Facebook.
Ajo thotë se lirimi i tyre pas gjashtë orësh ndodhi vetëm me intervenimin e Departamentit Amerikan, derisa si masë ndëshkuese, regjimi i atëhershëm, ia ndaloi Brantley hyrjen në territorin e Jugosllavisë për tri vjet.
“Desha ta tregoj të vërtetën e pathënë për 2 Korrikun dhe Deklaratën e Pavarësisë! Sepse e quaj të rëndësishme të them se kontributi i Evës ishte krucial dhe vendimtar për shpalljen e Deklaratës së Pavarësisë më 2 korrik. Pa të nuk jam fare e bindur se kjo ngjarje historike do të ndodhte më 2 korrik. Mbase do të ndodhte më vonë. Por kurrë nuk dihet se çfarë mund të sajonte pushteti për ta penguar atë. Si fjala vjen burgosjen e ndonjë delegati për të pamundësuar kuorumin”, ka shkruar tutje ajo.
Pula kritikon institucionet se nuk i dhanë asnjëherë mirënjohje amerikanes për kontributin në Kosovë, dhe se nuk ishte kujtuar asnjëherë në shënimin e përvjetorit të 2 Korrikut.
“Një dekorim i saj post-mortum mbase do të ishte ndjesë për këtë shpërfillje e mosmirënjohje të pafalshme.”