Albanian
Croatian
English
French
German
Serbian
Turkish
Auditorët e pavarur kanë publikuar raportin e auditimit, mbi pasqyrat financiare të partive politike.
Në mesin e raporteve gjendet edhe ai i Lidhjes Demokratike të Kosovës, i përbërë nga pasqyra e pozitës financiare deri më 31 dhjetor të vitit që lëmë pas.
“Gjatë auditimit tonë, kemi konstatuar se Subjekti Politik LDK ka paraqitur një kontratë shitblerjeje për një pjesë të objektit dhe një kontratë qiraje për një pjesë tjetër të objektit që përdoret si seli qendrore. Megjithatë, pjesa më e madhe e këtij objekti vazhdon të mos jetë e mbuluar me dokumentacion të plotë pronësie, si fletët poseduese, ose me kontrata të vlefshme qiraje, pavarësisht se subjekti politik ka deklaruar dhe paguar tatim në pronë për këtë objekt në vlerë prej 765.00 euro për vitin e përfunduar më 31 Dhjetor 2024. Mungesa e dokumentacionit të pronësisë dhe qirasë kufizon aftësinë tonë për të verifikuar ekzistencën, tërësinë dhe saktësinë e vlerës së pasurive të regjistruara në pasqyrat financiare” bëjnë të ditur auditorët.
Në përgjithësi, auditorët vlerësues te LDK-ja kanë gjetur mungesë të procedurave të tenderimit për blerje, mospërmbushje të kërkesave për kontroll të brendshëm dhe mungesë të dokumentacionit për zyrat e pashpalosura.
Për dallim nga viti 2023, kur LDK-ja deklaroi toka, objekte dhe pajisje në vlerë prej 27 mijë e 459 euro e 34 centë, vlera e tyre për vitin 2024, sipas deklarimit, është 136 mijë e 111 euro e 23 centë.
Në total, pasuritë afatshkurtra dhe afatgjata të LDK-së, gjithnjë sipas vlerësimit të auditorit deri më 31 dhjetor 2024, kanë vlerë prej 139 mijë e 717 euro e 52 centë.
Partia ka deklaruar detyrime afatgjata në vlerë mbi 162 mijë e 607 euro, dhe detyrime afatshkurtra në vlerë prej 200 mijë e 986 euro.
Gjatë vitit 2024, LDK-ja deklaroi të hyra me vlerë 643 mijë e 47 euro dhe shpenzime me vlerë prej 594 mijë e 398 euro e 8 centë.
KËTU mund të lexoni raportin e plotë të auditimit.