Pse po insistojnë me Albulena Haxhiun, Kurti: S’po e votojmë për mbretëreshë, por për kryetare të Kuvendit

Kryeministri në largim, Albin Kurti, tha se do të bëhet kompromis, sipas tij, nëse Albulena Haxhiu votohet vetëm një herë me votim të fshehtë.

Gazetari që po e interviston në “Tëvë1” disa herë tentoi ta pyesë Kurtin se pse po insistojnë në vetëm një emër.

“Pse po insistoni në një emër?” – u pyet ai.

Kurti vijoi ta përfundonte mendimin e tij, duke i thënë gazetarit se po humb kohë kot, derisa ai të përfundonte pjesën e tij.

“Duhet ta përfundoj këtë pjesë, humbim kohë kot në vend se ta përfundoj këtë pjesë. Provoni ta dëgjoni deri në fund, vetëm po dua ta përfundoj mendimin.

Prandaj po them se është kompromis, e cila e ka pranuar qëndrimin e Albulena Haxhiut që të votohet vetëm një herë.

Ajo e ka bërë këtë njëanshëm, prandaj po them se është kompromis” – tha Kurti, derisa gazetari ia rikujtoi se nuk i kanë votat.

“Veç pak, në bazë të Kushtetutës, propozimin e jep grupi më i madh parlamentar, fituesi i zgjedhjeve, jo dikush tjetër. Kemi dëgjuar propozimet e të tjerëve, por propozimi ynë është Albulena Haxhiu – kjo nuk u pranua.

Nuk po votojmë për Albulena Haxhiun si mbretëreshë, por për kryetare të Kuvendit. Kushtetuta thotë se zgjedhja e kryetarit dhe nënkryetarit është kusht i domosdoshëm për konstituimin” – u shpreh ai.