Protestat në Francë, fermerët hedhin patate e pleh dhe lënë një arkivol pranë rezidencës së Macron

Qeveria franceze të premten bëri thirrje për një marrëveshje për qetësim për Krishtlindje me fermerët protestues, duke paralajmëruar kundër bllokadave të mëtejshme gjatë sezonit të festave, një veprim që sindikata kryesore e vendit tha se varej nga përgjigjja e kryeministrit ndaj kërkesave të tyre.

Fermerët kanë bllokuar rrugë, kanë hedhur pleh organik dhe kanë zhvilluar protesta në Francë për më shumë se një javë, për të kundërshtuar mënyrën se si qeveria po menaxhon sëmundjen e dermatitit nodular te gjedhët dhe një marrëveshje tregtare me bllokun e Amerikës së Jugut, Mercosur, shkruan Reuters.

Fermerët u mblodhën me traktorë herët të premten përpara rezidencës së Presidentit Emmanuel Macron në vendpushimin bregdetar Le Touquet në Francën veriore, duke vendosur një arkivol me mbishkrimin “RIP Agri” dhe “JO Mercosur”.

Ndërkohë, në qytetin jugor të Avignon, fermerët hodhën patate në ndërtesat publike.

Protestuesit argumentojnë se politika e qeverisë për asgjësimin e të gjithë tufës kur zbulohet sëmundja e dermatitit nodular është e tepruar dhe mizore. Ata po ashtu pretendojnë se marrëveshja BE-Mercosur, nënshkrimi i së cilës është shtyrë për në janar, do të lejonte importe masive të produkteve që nuk përmbushin standardet franceze.

Kryeministri Sebastien Lecornu po zhvillonte takime me sindikatat kryesore të fermerëve.

Kreu i FNSEA-s, më e madhja në vend, tha se Lecornu u zotua të dërgonte një letër deri në mbrëmje me përgjigje për një sërë çështjesh bujqësore.

“Kjo letër do të jetë vendimtare”, u tha gazetarëve Kryetari i FNSEA-s, Arnaud Rousseau, duke shtuar se sindikata do të merrte më pas një vendim nëse do t’i pezullonte protestat.

Koordinimi i Sindikatave Rurale dhe Konfederata Paysanne, të cilat kishin udhëhequr bllokadat, thanë se do t’i linin fermerët në secilin rajon të vendosnin nëse do të vazhdonin protestat.

“Jemi shumë të zhgënjyer”, tha Stephane Galais, zëdhënës i Konfederatës Paysanne, pas takimit me Lecornu.

“Vendimi do të merret në nivel lokal, por do t’ju them këtë: nuk mund t’i heqim bllokadat”.

Zëdhënësja e qeverisë, Maud Bregeon, tha në radion RTL se qeveria nuk do të toleronte më bllokada të mëtejshme dhe do të bënte “gjithçka të nevojshme” për t’i shmangur ato.